Céard is bruth clúidín ann?

Bíonn bruth clúidín ina chúis choitianta do pháistí cráite ag caoineadh. Craiceann séidte is cúis leis seo a bhíonn greannaithe de bharr a bheith fliuch agus i dteagmháil le fual agus stóil. Tosaíonn sé le deargadh an chraicinn san áit a mbíonn an clúidín agus bíonn an craiceann tinn agus míchompordach dá bharr.

Cén chúis atá le bruth clúidín?

Tarlaíonn bruth clúidín nuair a dhéanann fual teagmháil le craiceann an pháiste ar feadh tréimhsí fada ama. Imoibríonn an fual leis na stóil sa chlúidín, rud a chuireann isteach ar an gcraiceann agus i ndroch-chásanna scoilteann an craiceann nó tagann léasrach air. Is féidir leis an gcraiceann a bheith ionfhabhtaithe ansin. Is féidir leis an gcuimilt a dhéanann an clúidín ar chraiceann mín an pháiste agus gan púdar níocháin a bheith glanta amach i gceart as na clúidíní a bheith ina gcúiseana do bhruth clúidín chomh maith.

Cén uair is mó a dtarlaíonn bruth clúidín?

Is féidir le bruth clúidín tarlú am ar bith agus b'fhéidir nach mbeadh aon chúis shoiléir ann mar go mbíonn craiceann roinnt páistí íogair go nádúrtha agus b'fhéidir go gcuirfeadh sé seo isteach orthu níos éasca.

Mar sin féin, tá amanna ann a mbíonn páistí so-ghabhálach do bhruth clúidín, mar shampla:

• Nuair a bhíonn gearradh fiacla ag cur isteach orthu
• An t-athrú ó bheathú cíche go beathú ó bhuidéal
• I ndiaidh antaibheathaigh, a chuireann isteach ar chóras díleáite an pháiste, a chuireann an bhuinneach orthu
• Ag tosú ar bhia soladach
• Ag ól bainne bó den chéad uair

Is féidir le ceann ar bith acu seo a bheith ina chúis do bhruth clúidín.

Cén chuma atá ar bhruth clúidín?

Is féidir bruth clúidín a aithint ar roinnt bealaí:

• Tosaíonn bruth clúidín go hiondúil le deargadh san áit a bhfuil an clúidín.
• Go hiondúil ní chuireann sé isteach ar fhilleadh an chraicinn
• Is féidir le háiteanna mar shampla an tóin agus na ceathrúna a bheith dearg agus fliuch
• Is féidir leis an gcraiceann a bheith tinn, spotaí a bheith air agus te má leagann tú do lámh air
• D'fhéadfadh sé go mbeadh paistí de chraiceann tirim, lubhógach.

I ndroch chásanna bíonn léasrach agus spotaí lán le gor.

Is é an rud is fearr a dhéanamh ná bruth clúidín a chosc sa chéad áit ach má tharlaíonn sé is féidir an bruth a sháimhriú agus a chneasú agus cosc a chur leis tarlú arís trí ungadh bruth clúidín a úsáid gach uair a chuirfear clúidín glan ar an bpáiste.

Léigh an lipéad i gcónaí.